08 апреля 2011 г.
Автовокзал çумĕнчи ял хуçалăх пасарĕнче Канашри элеваторăн магазинĕ "Органика" ятпа уçăлчĕ. Унта хăйсене кирлĕ таварсене чи малтан район администрацийĕн пуçлăхĕ В.Софронов, Раççей ял хуçалăх банкĕн Канашри офисĕн управляющийĕ Т.Волков, пасар директорĕ В.Васильев туянчĕç. Магазин ĕçлеме пуçланă ятпа вĕсемпе пĕрле "Чăваш çăкăр-булка продукчĕ" предприятин генеральнăй директорĕ А.Ласточкин, Канашри филиалĕн директорĕ А.Богданов саламларĕç.
Магазин ассортиментĕнче предприяти столовăйĕнче пĕçернĕ продуктсем те – хура çăкăр, тĕрлĕ кукăль, булка пур. Хула тата ял çыннисем ыйтнипе апат-çимĕç продукчĕсене вырăна тухса сутассине йĕркеленĕ. Малашлăхра – çакăн пек лавккасем ял тăрăхĕсен территорийĕсенче уçасси.
А.ВИТАЛЬЕВ.