18 марта 2011 г.
Йĕпреç поселокĕнче "Патвар" физкультурăпа спорт комплексĕнче Чăваш Республикин вырăнти хăй тытăмлăх органĕсенче ĕçлекен хĕрарăмсем хушшинче мини-футболла выляса мала тухассишĕн йăлана кĕнĕ III ăмăртăвĕ иртнĕ. Кăçал унта Улатăр, Патăрьел, Йĕпреç, Канаш, Элĕк, Куславкка тата Етĕрне районĕсен командисем хутшăннă.
Турнир икĕ ушкăнра иртнĕ. Финалта ушкăн çĕнтерÿçисем, Канашпа Йĕпреç районĕсен командисем, тĕл пулнă. Тĕл пулу 2:1 шутпа, пирĕннисем çĕнтернипе, вĕçленнĕ. Виççĕмĕш вырăншăн элĕксемпе патăрьелсем кĕрешнĕ. Пăла тăрăхĕн хĕрарăмĕсем ăстарах пулнă. Çĕнтерÿçĕсемпе призерсене кубоксем тата асăнмалăх медальсем панă.
Пирĕн район чысне Ирина Мартынова, Татьяна Николаева, Мария Александрова, Людмила Кириллова, Татьяна Александрова тата Алина Павлова хÿтĕленĕ. Йĕпреç районĕн командин членне Лариса Быковăна чи лайăх вылякан тесе йышăннă.
А.ВИТАЛЬЕВ.
ŸКЕРЧĔКРЕ: Йĕпреç райадминистрацийĕн пуçлăхĕ А.Петров (галстукли) тата муниципаллă тытăмсен канашĕн ĕçĕсене тăвакан директорĕ С.Николаев пирĕн район командипе.