16 марта 2011 г.
Тÿперен лĕпĕш евĕр вĕлтĕртетсе юр пĕрчисем анаççĕ. Хĕллехи çак илемлĕ кун Янкăлчра пурăнакан К.Николаева, пĕлетĕр-и, 100 çул тултарчĕ. Çак ятпа ăна чи малтан чи çывăх тăванĕсемпе çыннисем саламларĕç. Вĕсем ăна анне, асанне, кукамай, мăн асанне, мăн кукамай тесе чĕнеççĕ. Кира Николаевна мăшăрĕпе 3 ывăлпа 2 хĕр çитĕнтернĕ. Халĕ унăн 14 мăнук, кĕçĕн мăнукĕсем 20-ĕн, кĕçĕн мăнукĕсен ачисем 8-ăн. Колхозра ĕçлесе тивĕçлĕ канăва тухнă. Кира Николаевна кĕçĕн хĕрĕпе, Людмилăпа, тата кĕрÿшĕпе пурăнать.
Юбилей ячĕпе саламлама район администрацийĕн пуçлăхĕн çумĕ К.Никоноров, Янкăлч ял тăрăхĕн пуçлăхĕ А.Кротов килчĕç. Вĕсем Кира Николаевнăна çирĕп сывлăх сунса чечек çыххи тата парне пачĕç. Ялти вăтам шкулăн юрă ăстисем илемлĕ чăваш юррисем шăрантарчĕç. Кÿршĕре пурăнакансем те К.Николаева пирки нумай ăшă сăмах каларĕç, çĕр çинчи чи çепĕç сăмахсемпе саламларĕç.