16 февраля 2011 г.
Вырсарни кун, нарăсăн 13-мĕшĕнче, "Раççей йĕлтĕр йĕрĕ–2011" ăмăртусем иртрĕç. Пĕр вăхăтрах республикăри хуласемпе районсенче старта тухрĕç.
Пирĕн районта 700 яхăн çын йĕлтĕр çине тăчĕ. Çак кун вĕсемшĕн чăн-чăн уяв пулчĕ. Ăмăртусем ачасен А.Г.Николаев ячĕллĕ лагерь территоринче иртрĕç. Йĕлтĕр спорчĕн профессионалĕсем, йĕлтĕрпе ярăнма кăмăл тăвакансем, шкул ачисем, студентсем, тĕрлĕ предприятипе организаци представителĕсем хутшăнчĕç. Район администрацийĕн пайĕсем, ял тăрăхĕсем, шкулсем, территори органĕсен федераллă службисем командăсем тăратрĕç.
Ăмăртусене уçнă çĕре Чăваш Республикин сывлăх сыхлавĕн тата социаллă аталанăвĕн министрĕн çумĕ Л.Рулькова, физкультура, спорт тата туризм министрĕн çумĕ А.Яковлев, район администрацийĕн пуçлăхĕ В.Софронов хутшăнчĕç, сăмах каларĕç.
Ăмăртура мала тухнисене дипломсем, медальсем пачĕç. Медицина службин тата вĕри апат пункчĕсем ĕçлерĕç.
В.АЛЕКСЕЕВ.