02 февраля 2011 г.
Коммерци организацийĕн пуçлăхĕ Кириллов (хушаматне улăштарнă) ĕç вырăнĕпе усă курса пуйма шутланă. Хăй патне кивĕ шпалсем туянас шутпа пынă Баранова (урăхла хушамат) кашни шпалшăн, вĕсем вара пĕтĕмпе 200 штук, уйрăммăн 70-шер тенкĕ алăран пама ыйтнă. Лешĕ хирĕçлесе тăман – килĕшнĕ. Уйăхран Баранов банк урлă организаци счечĕ çине 15380 тенкĕ те 12 пус куçарнă хыççăн Кириллов патне пынă. Унта вăл пуçлăха алăран, малтанласа калаçса татăлнă пекех, 14 пин тенкĕ тыттарнă. Лешĕ ямăт укçана йăпăр-япăр кĕсйине персе чикнĕ.
Суд Кириллов хăйĕн айăпне йышăнни, ÿкĕнни çинчен пĕлтернĕ. Ун çинчен ĕçре те, пурăннă çĕрте те ыррине çеç каланине шута илсе ăна ирĕкрен хăтарас темен, пысăк штраф тÿлеттерме йышăну кăларнă.