24 декабря 2010 г.
Паян каçхине кăна мар, кăнтăр кунĕнче те урама тухма хăрушă. Алăксене питĕрсе ларни те вырăнлă пек туйăнать. Унсăрăн, кам пĕлет, килте телевизор курса ларнă çĕртех кĕрсе хĕнесе хăвараççĕ.
Ухманта çавăн пек пулнă та. Февраль уйăхĕн пĕр кунĕнче. Ялĕ пысăк пулнăран çынсем пĕр-пĕрне палласах çитереймеççĕ. Палласан та мĕн, хирĕçес-çапăçас шухăшлă çын пĕлĕш пулнине пăхса тăмасть, наччасра тÿпкесе хăварать. Çуркунне хуларан яла куçса килсе тĕпленнĕ Женьăна амăшĕ лавккана çăкăр кайса илме хушнă. Çул çинче çамрăкăн çулне эрех ĕçсе хĕрнĕ арçынсем пÿлнĕ. Женьăна палламан вĕсем, унпа хирĕçме пикеннĕ, "Немиров" эрех туянса пама ыйтнă. Каччă хирĕçленине курсан пĕри ăна шăхăртса янă. Женя магазина кĕрсе кивçен эрех ыйтнă, сутăçă хирĕçленĕ, никама та кивçен памастăп тенĕ. Каччă урама тухнă, арçынсем виççĕшĕ те ăна хĕнеме пуçланă. Кам мĕнле пултарнă çапла - тапнă, çапнă.
С. НИКИТИНА, следователь.