24 сентября 2010 г.
Иртнĕ канмалли кунсенче Çеçпĕл тата Малтикас ялĕсенче пурăнакан салтак арăмĕсем Анна Павловна Павловăпа Клавдия Петровна Яковлева çĕнĕ пÿрте пурăнма куçнă. Вăрçă ветеранĕсемпе салтак арăмĕсене çурт-йĕрпе тивĕçтермелли программăпа свидетельство илсен вĕсем хулара хваттер туянма шутламан, патшалăх паракан пулăшупа усă курса тăван вырăнтах çурт ларттарсан аванрах тенĕ. Р.Зинатуллин ертсе пыракан "Канашская ПМК" организаци ĕçченĕсем виçĕ уйăхра кирпĕчрен çав тери илемлĕ те хăтлă икĕ çурт хăпартса ăна пурăнмалла туса çитернĕ: пÿрте газ, шыв кĕртнĕ, канализаци хывнă. Хулари хваттерти пекех.
Кинемейсем хăйсене çакăн пек тимлĕх уйăрнăшăн патшалăх, республика, район ертÿçисене чунтан тав тунă. Райадминистраци пуçлăхĕ ветерансене çĕнĕ пÿрт хуçисем пулса тăнă ятпа саламланă, вăрăм ĕмĕр суннă.
Çак программăпа черетре тăракансем ялта çурт тутарасси пирки иккĕленеççĕ пулсан, лару-тăрăва уçăмлатакан тĕс-лĕхсем куç умĕнче: Кайри Ăнтавăшра, Çеçпĕлте, Малтикасра строительство ĕçĕсене кĕске вăхăтра тата пахалăхпа пурнăçланă.