13 августа 2010 г.
Район администрацийĕн пуçлăхĕ В.Софронов Раççей чысне Будапешт хулинче юниорсен тĕнче чемпионатĕнче ирĕклĕ майпа кĕрешсе хÿтĕленĕ ентешсемпе тĕл пулнă. Вĕсем Карăклă хĕрĕ – Н.Федорова тата районти спорт шкулĕн воспитанникĕ А.Афанасьев. Надя кĕмĕл, Антон бронза медаль çĕнсе илнĕ.
"Кавир çинче питĕ ăнăçлă кĕрешрĕр, чăннипех те маттур эсир. Çакă ытти пысăк ăмăртусене хутшăнмалли лайăх старт пуласса шанатăп", – палăртнă Владислав Васильевич. Вăл Надьăпа Антона çитĕнÿ тунă ятпа районта пурăнакансен ячĕпе тав тунă, саламланă.
"Тĕнче чемпионатĕнче, Олимп вăййисенче чăваш ятне ярас марччĕ", – тенĕ тĕл пулăва килнĕ А.Афанасьевпа Н.Федорова. Вĕсем хăйсене тĕнче чемпионатне хутшăнма хатĕрленĕ çынсене, уйрăмах тренерсене, ăшă сăмахсемпе тав тунă.