19 мая 2010 г.
Аслă Çĕнтерÿ кунне анлăн уявласа ирттертĕмĕр пулин те, уяв саманчĕсем малалла тăсăлаççĕ. Кăçал пулакан пысăк мероприятисене пурне те тенĕ пекех Аслă Çĕнтерÿ 65 çул тултарнине халалланă. Çа-вăнпа çынна савăнăç кÿме пултаракан кашни самантах паха.
Тунти кун район администрацийĕнче çурт-йĕр условийĕсене лайăхлатма черете тăнă вăрçă участникĕсемпе инваличĕсене, фронтра пуç хунă тата вăрçăран таврăнсан вилнĕ салтаксен арăмĕсене свидетельство пачĕç. Район администрацийĕн пуçлăхĕ В.Софронов пухăннисене ăшшăн саламларĕ, вăрăм та ăраскаллă кун-çул сунчĕ. 16 ветеран çак кун свидетельствăллă пулчĕ: хăш-пĕр ватăсем хăйсем килнĕ, çÿрейменнисен документа илме ывăл-хĕрĕ, мăнукĕсем çитнĕ. Владислав Васильевич вĕсене пурне те свидетельство панă чухне çĕнтерĕве çывхартассишĕн ырми-канми вăй хунăшăн тав турĕ, çÿреймен ватăсем патне салам сăмахĕсене çитерме ыйтрĕ.
Паян районта çурт-йĕр условийĕсене лайăхлатмалли черетре 83 çын тăрать, 46 ветеран свидетельство илнĕ. Документпа килĕшÿллĕн ветерана тивекен 36 тăваткал метр пурăнмалли лаптăка е çĕнĕ çурт туса, е хваттер туянса хута яма пулать. Çак условисене свидетельствăна алла илнĕ хыççăн 4 уйăхра пурнăçа кĕртмелле. Маларах свидетельствăллă пулнă çынсенчен пиллĕ-кĕшĕ ялта çурт хăпартма килĕшнĕ. Кун пек чухне подрядлă организаципе килĕшÿ тумалла. Строительсем ветеран валли тунă çурта шывпа, çут çанталăк газĕпе тивĕçтереççĕ.
И.АНДРЕЕВА.