16 апреля 2010 г.
Культура министерстви, Чăвашпотребсоюз тата Чăваш кĕнеке издательстви республикăри потребобщество организацийĕсем хушшинче социаллă пĕлтерĕшлĕ литература сутассипе конкурс ирттересси пирки пĕлтереççĕ.
Конкурс тĕллевĕ - ял çыннисем хушшинче наци литературине юратма вĕрентесси тата çак туртăма чĕртсе тăратасси, ялта пурăнакансен ăс-хакăл, кăмăл-сипет, пултарулăх вăйне аталантарма пулăшасси, вĕсене социаллă пĕлтерĕшлĕ литературăпа май килнĕ таран тивĕçтересси.
Конкурс 4 номинаципе иртет. Çĕнтерÿçĕсене çак виçепе палăртаççĕ:
- "Социаллă литература сутакан лидер" - çулталăк итогĕсем тăрăх 1 кв. м суту-илÿ лаптăкне шута илсе социаллă пĕлтерĕшлĕ литературăна сутса чи пысăк кăтарту тунă организаци;
- "Социаллă пĕлтерĕш-лĕ литературăн чи лайăх сутуçи" - организацире ĕçлекен персонал пĕр çынран ытла пулмалла мар, çулталăк итогĕсем тăрăх 1 кв. м суту-илÿ лаптăкне шута илсе социаллă пĕлтерĕшлĕ литература сутса чи пысăк кăтарту тумалла;
- "Ачалăх çĕршывĕ" - çулталăк итогĕсем тăрăх 1 кв. м суту-илÿ лаптăкне шута илсе социаллă пĕлте-рĕшлĕ ача-пăча литературине сутса чи пысăк кăтарту тунă организаци;
- "Мухтав сана, вĕренÿ кĕнеки" ("Его величество - учебник") - çулталăк итогĕсем тăрăх 1 кв. м суту-илÿ лаптăкне шута илсе социаллă пĕлтерĕшлĕ вĕренÿпе методика литературине сутса чи пысăк кăтарту тунă организаци.
Конкурса хутшăнма 2011 çулхи февралĕн 15-мĕшĕччен Чăваш кĕнеке издательствине (Шупашкар хули, И.Яковлев проспекчĕ, 13, тел. 57-16-63, 55-24-09) конкурс материалĕсемпе пĕрле - вĕсем текст (ăнлантарса çырни), ÿкерчĕксем, фото, видео пулма пултараççĕ - заявка тăратмалла.
Пĕлтĕрхи конкурсра Комсомольскинчи "Суту-илÿ çурчĕ" ООО ("Социаллă литература сутакан лидер"), Муркашри райпо ("Мухтав сана, вĕренÿ кĕнеки") тата Йĕпреçри райпо ("Ачалăх çĕршывĕ") çĕнтернĕ.
Хамăр инф.