05 февраля 2010 г.
Район администрацийĕ çумĕнчи административлă комиссин черетлĕ ларăвĕ иртрĕ. Ăна комисси председателĕ – райадминистраци пуçлăхĕн çумĕ Владимир Степанов ертсе пычĕ. Ларура ял тăрăхĕсенче хатĕрленĕ 53 протокола пăхса тухрĕç. Карăклă, Чакаç, Уçырма, Энтрияль, Атнаш ял тăрăхĕсенче пурăнакан граждансен Чăваш Республикин 10-мĕш саккунне е, урăхла, тавралăха тирпей-илем кÿмелли правилăна пăснăшăн административлă йĕркепе явап тытма тиврĕ.
Унсăр пуçне Вăтапуç, Вăрăмпуç ялĕсенчи 16 çула çитмен темиçе çамрăк Канаш хулинче милици аллине лекнĕ. Хулара эрех ĕçнине никам та курмасть е тав-çăрмасть тенĕ-ши вĕсем; Ашшĕ-амăшĕ çумра çук чухне эрех тутанса пăхас килнĕ ĕнтĕ çамрăксен. Çавăншăн вара РФ КоАПĕн 20.22 статйипе килĕшÿллĕн 16 çула та çитмен çамрăксен ашшĕ-амăшĕн штраф тÿлеме тивнĕ. Ача-пăча çакăн çинчен шутлама пĕлет-и-ха. Уçырма ялĕнче милици сотрудникĕсем 14 çулти ÿсĕр хĕрачана тытса чарнă. Çак ÿсĕмрех эрех тутанса курнă пулсан малашне мĕн кĕтмелле вара;
Массăллă информаци хатĕрĕсенче шкул ачисем эрехпе туслашсан вĕсене мĕн кĕтни çинчен час-часах çыратпăр, милици сотрудникĕсем вĕренÿ учрежденийĕсенче ирттерекен тĕл пулусенче те çакăн çинчен тăтăш калаççĕ, апла пулин те ку шухăша кашниех пуçа чикмест çав. Питех те шел.
И.ВЛАДИМИРОВА.