25 декабря 2009 г.
Çĕнĕ çул уявĕсем çывхарнă май синкер пулăмсен шучĕ ÿсес хăрушлăх пысăкланать. Уяв елкине çирĕп вырнаçтарманнипе, пиротехника хатĕрĕпе, электрогирляндăпа пĕли-пĕлми усă курнипе пушарсем тухаççĕ, çынсем аманаççĕ. Ачасем те, çитĕннисем те пĕр пек инкек тÿсеççĕ. Пиротехника хатĕрĕсемпе тĕрĕс мар усă курнипе хăшĕ-пĕри аллисене, пит-куçне пиçтерсе ярать, сусăрланса юлать.
Инкек-синкек сирĕн килтен айккинчен пăрăнса ирттĕр тесен çак йывăрах мар правилăсене пăхăнмалла:
- чăрăша çирĕп вырнаçтармалла;
- елкăна хăвăрт хыпса илекен теттесемпе, мамăкпа, çуртапа, хутпа капăрлатма юрамасть;
- елкăна хутса ăшăтмалли система, эвакуаци алăкĕсем çывăхне вырнаçтармалла мар;
- бенгал çуртисене, пиротехника хатĕрĕсене пÿлĕмре çутма юрамасть;
- розеткăна чикнĕ электроприборсене тимлĕхсĕр хăварма юрамасть;
- заводра туса хатĕрленĕ электрогирляндăпа тата вĕсем пĕтĕмпех юсавлă пулсан кăна усă курма юрать;
- пушар тухрĕ пулсан çийĕнчех 01 е 2-13-37, 112 (кĕсье телефонĕпе) номерпе шăнкăравласа пĕлтерĕр;
- çынсене эвакуацилеме тата пушара алă айĕнчи хатĕр-семпе сÿнтерме мерăсем йышăнăр;
- килсе çитнĕ пушарнăйсен подразделенине пушар вырăнне кăтартмалла.
Енчен те эсир уявра пиротехника хатĕрĕпе усă курасах тетĕр пулсан çакна ан манăр:
- пиротехникăпа пÿртре ан усă курăр;
- фейерверка чÿречерен, форточкăран е балконран ан ярăр;
- петардăсене пÿрт чÿречинчен, пурăнмалли çуртсен подъезчĕсене ан пăрахăр, çын нумай пуçтарăннă вырăна, ура айне, çиелти тумтир кĕсйине, капюшонне ан пăрахăр;
- фейерверка çуртран, чĕр-чунсенчен, электропралукран, йывăçсенчен 20 метр айккинче çутăр;
Пушар хăрушсăрлăхĕпе яланах тимлĕ пулăр. Пĕчĕк ачасемпе çул çитмен çамрăксене пиротехникăпа хăйсене тĕллĕн усă курма ирĕк ан парăр. Ăна палламан çынсенчен, алран ан туянăр.
Л.ЛАВРОВА,
ВДПО инспекторĕ.