30 октября 2009 г.
«Çамрăксем сывă пурнăç йăли-йĕркишĕн» акципе килĕшÿллĕн Чакаç вăтам шкулĕнче социаллă педагогсен тата педагог-психологсен семинарĕ иртнĕ. Шкул администрацийĕ, педагогсен коллективĕ сывă пурнăç йăли-йĕркине пропагандăлас, психоактивлă япаласемпе усă курассинчен хÿтĕлес ĕçсем мĕнле пыни Е.Миронова соцпедагог докладĕнче уçăмлăн курăннă. 11 класра вĕренекенсем хăйсен ертÿçипе Л.Григорьевăпа Олимп вăййисенчен хăйне евĕрлĕ «репортаж» хатĕрленĕ. Çакна палăртма кăмăллă: класри 17 ачаран 11-шĕ – районта тата республикăра ирттернĕ ăмăртусен çĕнтерÿçисем. «Репортаж» пурне те килĕшнĕ.
Вĕренÿре физкультурăпа спорт занятийĕсем пысăк вырăн йышăнаççĕ. Çакна Л.Атласкин физрук 6-7 классенче вĕренекен ачасенчен йĕркеленĕ командăсем хушшинче ирттернĕ «хаваслă стартсем» лайăх кăтартса панă. Мероприяти кăçалхи юпа уйăхĕн 10-мĕшĕнче уçнă нумай функциллĕ спорт площадкинче иртнĕ.
Çĕнĕ Аччари пуçламăш шкулăн-ача сачĕн педагог-психологĕ Е.Васильева шкул çумĕнчи «Ташлакан çулла» лагерĕн профильлĕ программин презентацине кăтартнă. Çак программăн тĕп тĕллевĕ – ачан сывлăхне психика тата физкультура енчен музыкăпа пластика процесĕнче çирĕплетме кирлĕ условисем туса парасси.
А.ВИТАЛЬЕВ.