10:23 18 июля 2014 г.
2020 çулта Пĕтĕм Раççейри халăх çыравĕ иртĕ. Калама çук пысăк ĕçе хатĕрленме тытăннă та ĕнтĕ. 2015 çулхи кĕркунне çĕршывра хăйне евĕр пĕчĕк çырав ирттерĕç. Нумаях пулмасть Росстат çырава мĕнле ирттерес тĕлĕшпе семинар-канашлу йĕркеленĕ. Унта Чăвашстатăн уйрăм пуçлăхĕ Екатерина Петрова та хутшăннă. Халăхăн пĕчĕк çыравĕ çитес çул юпа уйăхĕн 1-мĕшĕнчен пуçласа 31-мĕшĕччен пырĕ. Пĕ-тĕмĕшле Раççейĕпе 7214 шутлав участокĕ уçăлĕ, вăл шутран 71-ĕшĕ- Чăваш Енре. Çулталăк вĕçлениччен регистраци участокĕсемпе картографи материалĕсене хатĕрлесе çитермелле. Çак ĕçсене тума кăçалах Чăвашстат 71 çынна явăçтарать. Черетлĕ перепиç çитиччен çакăн пек пĕчĕк çырав туса ирттерни халăхăн социаллă пурнăçĕпе демо-графи лару-тăрăвне лайăхрах пĕлме май парĕ. Пĕчĕк çырав вăхăтĕнче кил хуçалăхĕсем пирки хыпарсем пухнă чухне хальхи вăхăтри çĕнĕ мелсемпе усă курĕç. Вăл шутра интернет урлă перепись ыйтăвĕсене хуравлани, йăтса çÿремелли планшет компьютерĕсемпе усă курни. Америка, Канада, Болгари, Эстони çĕршывĕсенче интернет-перепись ирттерессипе опыт пухнă та ĕнтĕ. Халăх пирки кăтартусем пухма интернетра çитес çулăн пĕрремĕш кварталĕн-че ятарлă сайт - "Микроперепись населения - 2015" - уçăлĕ. Унтах ыйтусене хуравламалли страница пулĕ, кашни çын хăйĕнпе килтисем çинчен пĕлтерме пултарĕ. Пĕтĕм Раççейри 2010 çулхи çырав вăхăтĕнче пирĕн çĕршывра 143,2 миллион çынна шута илнĕ (Чăваш Енре - 1251,1 пин). Вăл шутран 3,6 миллион çынна - административлă ресурссемпе усă курса. Кунта тĕрлĕ сăлтавпа перепиçе хутшăнман е çырав вăхăтĕн-че килте пулман е алăка уçман çынсем кĕнĕ. Çын патне киле пымасăрах информаци ыйтса илессине пурнăçа кĕртсе пыни ĕçе самай çăмăллатĕ. Килтен тухмасăрах кирек хăш вăхăтра çырав хучĕсене информаци центрне ярса пама пулать-çке. Унсăр пуçне çакă пĕтĕмлетĕве планшетсемпе тивĕçтерсен электрон мелĕпе йышăннă хыпар тÿрех информаци центрне çитет. Вăл е ку ялта планшетпа усă курма май çук е унпа çÿрени тăкаклă пулсан çырав хучĕсене ĕлĕкхилле çырса тултарĕç. Ыйтусене çак тĕлĕшпе ятарласа уйăрнă çырав участокĕсенче те хуравлама пулĕ.
Е.НИКОЛАЕВА.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики