15:29 18 июня 2014 г.
Чăваш Ен Пуçлăхĕ Михаил Игнатьев виçĕм кун республика Правительствин членĕсемпе, федерацин территори органĕсен тата хула округĕсен ертÿçисемпе канашлу ирттернĕ. Малтанах Михаил Игнатьев Министрсен Кабинетне РФ Президенчĕн 2015 çулта Раççейре Литература çулталăкне ирттересси çинчен калакан указне пурнăçлассипе çыхăннă мероприятисене йĕркелеме хушнă. Вĕренÿ министрĕ Владимир Иванов шкул пĕтерекенсем патшалăхăн пĕрлехи экзаменĕсене мĕнлерех тытнипе паллаштарнă. Вăл палăртнă тăрăх, вырăс чĕлхипе экзамена çамрăксен 98,44 проценчĕ ăнăçлă тытнă, 80 е ытларах балл пухнисем - 20, 32 проц. (Раççейре вăтам кăтарту - 13,26 проц.). Анчах тивĕçлĕ мерăсем йышăннă пулин те экзамен тытакансем, йĕркелÿçĕсем йĕркене пăснă тĕслĕхсем пулнă. Патăрьел районĕнче унашкалли уйрăмах нумай. Чăваш Ен Пуçлăхĕн шухăшĕпе, республикăра шкул пĕтерекенсем экзаменсенче çуллен лайăх кăтартусемпе палăраççĕ, анчах ыйтусем пур: "Экзаменсен йĕркелÿ шайне ÿстермелле, должноçри çынсен яваплăхне çирĕплетмелле". Культура министрĕ Вадим Ефимов федерацин Атăлçи округĕнче Культура çулталăкне ирттерессипе çыхăннă чи лайăх опыта палăртмалли конференцие хатĕрленни çинчен каласа панă. Çав конференци Шупашкарта çĕртме уйăхĕн 18-19-мĕшĕсенче иртмелле, унта округри мĕн пур субъект представителĕсем, РФ культура министрĕн çумĕ Алла Манилова, Патшалăх Думин Культура енĕпе ĕçлекен комитечĕн председателĕ Елена Драпеко, ыттисем хутшăнмалла. Регионсем хушшинчи "Молгород-2014" вĕрентÿ форумĕ çинчен вĕренÿ министрĕ Владимир Иванов каласа панă. Атăл леш енче йĕркеленĕ форума 1,2 пин ытла çамрăк хутшăннă, çав шутра - Мари Эл, Пуш- кăртстан, Оренбург облаçĕн яш-кĕрĕмĕпе хĕр-упраçĕ. Халĕ яшсемпе хĕрсем Атăлçи округĕнчи "iВолга" форумне кайма хатĕрленеççĕ. Вăл çĕртме уйăхĕн 18-28-мĕшĕсенче Самар облаçĕнче иртет. Темиçе смена пулать: "Эсĕ - предприниматель", "Ырăлăх технологийĕсем", "Информаци юхăмĕ", "Ман хыççăн чуп", "Политика тата студентсен хăй тытăмлăхĕ", "Ял çамрăкĕсем" тата ыт. те. Çавăн пекех çамрăксен инноваци тата социаллă проекчĕсен конкурсне йĕркелеççĕ. Чăваш Енĕн 90 çынран тăракан делегацийĕ унта тĕрлĕ енлĕ 257 проект илсе каять. Çав шутра - Чăваш Енĕн паллă вырăнĕсемпе, наци тата культура йăли-йĕркипе паллаштараканнисем. "Проектсене тепĕр хут тĕплĕ тишкермелле, пахалăх енĕпе тивĕçтерменнисене тÿрех пăрахăçламалла", - сĕннĕ Михаил Игнатьев. Физкультурăпа спорт министрĕ Сергей Мельников Раççей пенсионерĕсен Шупашкарта иртнĕ пĕрремĕш спартакиадин кăтартăвĕсемпе паллаштарнă.
К.ЯКОВЛЕВ.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики