10:31 04 апреля 2014 г.
Раççей Федерацийĕн Правительствин ятарлă йышăнăвĕпе килĕшÿллĕн кăçалхи апрель уйăхĕнче халăх вăхăтăн талăкри фончĕпе мĕнле усă курнине сăнаççĕ. Раççейре пĕтĕмпе 10 пин кил хуçалăхне ыйтаççĕ, Чăваш Енре - 98 кил хуçалăхне, вĕсенчен 56-шĕ - хулара, 42-шĕ - ял тăрăхĕнче. Росстат сăнавне Шупашкар, Çĕнĕ Шупашкар, Улатăр, Канаш, Çĕмĕрле, Çĕрпÿ хулисене, çавăн пекех Шупашкар районĕнчи Тутаркасси, Вăрнар районĕнчи Мăн Явăш, Канаш районĕнчи Анаткас ялĕсене кĕртнĕ. Респондентсене 3 формăпа ыйтаççĕ: çемье, харпăр хăй (15 çулти тата унран аслăрах ÿсĕмрисем валли) анкетисене хуравламалла тата "Вăхăтпа усă курнин дневникĕ" ятарлă бланка çырса тултармалла. Тĕпчев пĕтĕмлетĕвĕсем тăрăх çынсем ĕçе, вĕренĕве, килти ĕçсене тăвассине, ачасене пăхассипе воспитани парассине, пушă вăхăта ирттерме, канăва мĕн чухлĕ вăхăт уйăрни паллă пулать. Кунашкал тĕпчеве малашне кашни 5 çулта пĕрре ирттереççĕ.
ЧĂВАШСТАТ.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики