15:10 23 октября 2013 г.
Чăваш Ен Пуçлăхĕ Михаил Игнатьев тунти кун Министрсен Кабинечĕн членĕсемпе, федераци ведомствисен территори органĕсен тата муниципалитетсен ертÿçисемпе канашлу ирттернĕ.
Экономика аталанăвĕн министрĕн тивĕçĕсене пурнăçлакан Владимир Аврелькин республикăн кăçалхи тăхăр уйăхри социаллă пурнăçпа экономика аталанăвĕн кăтартăвĕсемпе паллаштарнă. Çак тапхăрта пурăнмалли 457,8 пин тăваткал метр çурт-йĕр хута янă – пĕлтĕрхи çак тапхăртипе танлаштарсан 105,1 проц. Авăн уйăхĕнче вара пĕлтĕрхи çак уйăхрипе танлаштарсан 174,5 проц. чухлех пулнă – Атăлçи округĕнче виççĕмĕш вырăн. Çурт-йĕр тăвакан организацисем пĕтĕмпе 194,5 пин тăваткал метр лаптăка хута янă – иртнĕ çулхи çак тапхăртинчен 2,1 хут нумайрах.
Промышленноç производствин индексĕ кăрлач-авăн уйăхĕсенче 90,4 проц. çитнĕ. В.Аврелькин палăртнă тăрăх – республика промышленноçĕнче ырă туртăмсем пур, çавна май çулталăк вĕçленнĕ тĕле промпроизводство индексĕ 99-100 проц. пулмалла.
Мĕн пур категорири хуçалăхсенче ял хуçалăх продукцийĕ туса илесси кăçалхи кăрлач-авăн уйăхĕсенче 87,5 проц. танлашнă. Чакнин тĕп сăлтавĕ – çанталăк условийĕсем япăх пулнине кура ĕççи тăсăлса кайни. Паянхи кун тĕлне çĕр улмине мĕн пур лаптăкăн 90 проц. çинче кăларнă, пахча çимĕç пухса кĕртес енĕпе ĕçлеççĕ.
Ĕç укçин уйăхри шутласа панă вăтам виçи кăрлач-çурла уйăхĕсенче 18711,7 тенке çитнĕ, пĕлтĕрхи çак тапхăртинчен 14,3 проц. ÿснĕ, чăн ĕç укçи 6,8 проц. пысăкланнă. Федерацин Атăлçи округĕнчи регионсен хушшинче вăхăтра тÿлемен ĕç укçи парăмĕ Чăваш Енре чи пĕчĕкки. Республика Пуçлăхĕ çак сферăра тĕрĕслев ĕçĕ пирки манма юраманни, шалăва вăрттăн схемăсемпе тÿленĕ тĕслĕхсене пÿлмелли пирки каланă.
ГКЧС ертÿçи Вениамин Петров кĕркуннехи-хĕллехи тапхăрта шыв объекчĕсем çинче çынсен хăрушсăрлăхне тивĕçтерес тесе ыйтупа сăмах илнĕ. Юпа уйăхĕн 18-мĕшĕ тĕлне республикăра шывра пулнă 58 инкеке официаллă майпа шута илнĕ – 53 çын путса вилнĕ. Çав шутра пулă тытнă чух хăрушсăрлăха уяманнипе 8 çын пурнăçĕ татăлнă. Юлашки тĕслĕх юпа уйăхĕн 11-мĕшĕнче пулнă. Шупашкар районĕнчи Вăрманкасра тăватă пулăç ларнă кимĕ çаврăнса ÿкнĕ – пĕр çын путса вилнĕ.
М.Игнатьев пулăçсене пирвайхи пăр çине тухасран чарма хăтланнин усси пирки иккĕленнине палăртнă. "Пулăçсен хăйсен культурине ÿстермелле –унсăрăн май çук", – тенĕ вăл, ГКЧСа халăхпа ăнлантару ĕçне анлăн йĕркелеме сĕннĕ.
Культура министрĕ Вадим Ефимов Чăваш Республикин Федераци Канашĕнчи кунĕсене хатĕрленни пирки каласа панă. Унта ЧР Патшалăх Канашĕн ĕç-хĕлĕпе, Чăваш Енĕн ĕç-хĕлĕпе, Чăваш Енĕн инвестици хывмалли майĕсемпе, промышленноçри, ял хуçалăхĕнчи, сывлăх сыхлавĕнчи, вĕрентÿри, социаллă сферăри, физкультурăпа спортри çитĕнĕвĕсемпе паллаштарĕç. Ÿнер экспозицине Раççей тава тивĕçлĕ, чăваш халăх художникĕн Праски Виттин хайлавĕсенчен, Шупашкарти ÿнер училищинчен вĕренсе тухнисен керамика ĕçĕсенчен, авалхи чăваш наци тумтирĕн тĕслĕхĕсенчен, ытти экспонатран йĕркелĕç.
Юлашкинчен Спорт министерствин ертÿçи Сергей Мельников "Чăваш Ен – ДЮСШ" футбол команди, республика Пуçлăхĕ тата Правительстви пулăшнипе РФ чемпионачĕн 3-мĕш дивизионĕнче çак сезонра тупăшăва пуçласа тухнăскер, ăмăртусем вĕçлениччен пĕр тур маларах 3-мĕш вырăн çĕнсе илни пирки пĕлтернĕ. Çак командăра республикăри спорт шкулĕсенче ăсталăха туптакансем кăна. М.Игнатьев футболистсене çитĕнÿ тунă ятпа саламланă. "Вĕсемпе тĕл пулăпăр. Футбол уйĕнче..." – шантарнă вăл.
К.АЛЕКСАНДРОВ.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики