10:02 27 сентября 2013 г.
Чăваш Республикин Информаци политикипе массăллă коммуникацисен министерствин "Канаш районĕн "Канаш" хаçат редакцийĕ" автономлă учрежденин яваплă секретарĕ, Раççей Федерацийĕн журналистсен Союзĕн членĕ Виталий Алексеевич Алексеев (Ачча) массăллă информаци хатĕрĕсенче 33 çул вăй хурать.
В.Алексеев Çĕнĕ Ачча ялĕнче 1953 çулхи сентябрĕн 27-мĕшĕнче çуралнă. И.Н. Ульянов ячĕллĕ Чăваш патшалăх университечĕн историпе филологи факультечĕн чăваш чĕлхипе литературин уйрăмне вĕренсе пĕтернĕ, Совет Çарĕнче хĕсметре пулнă. Ĕçлĕ кун-çулне вăл Канашри вакунсем юсакан заводра пуçланă, столяр пулса ĕçленĕ. Аслă пĕлÿ илнĕ дипломлă специалист пулса тăрсан çырусен пайĕн заведующийĕнче, Комсомольски районĕн "Октябрь ялавĕ" хаçатăн яваплă секретарĕнче тăрăшнă. 1986 çултан пуçласа паян кунччен Виталий Алексеевич яваплă секретарь ĕçне чыслăн пурнăçласа пырать, хаçата вулакана килĕшмелле тăвас тесе чунне парать. Унăн çĕр ĕçченĕсем, врачсем, механизаторсем, выльăх-чĕрлĕх пăхакансем, учительсем, район администрацийĕн, вырăнти çар комиссариачĕн ĕçĕ-хĕлĕ çинчен çырнă статйисене вулакансем кăмăлласа йышăнаççĕ. Пирĕн ĕçтеш районта иртекен пур мероприятине те çитме ĕлкĕрет, çынсемпе тĕл пулса паха та интереслĕ материалсем хатĕрлет, вĕсене сăн ÿкерчĕксемпе пуянлатать. Виталий Ачча республикăри чăвашла тухса тăракан хаçатсемпе те тачă çыхăну тытать.
Массăллă информаци хатĕрĕсенче нумай çул тÿрĕ кăмăлпа ĕçленĕшĕн В.Алексеева "Чăваш Республикин культурăн тава тивĕçлĕ ĕçченĕ" сумлă ятпа чысланă. Раççей Федерацийĕн, Чăваш Республикин журналистсен Союзĕсен, Чăваш Республикин Культура, национальноçсен ĕçĕсен, Информаци политикипе архив ĕçĕн министерствин, республикăн Информаци политикипе массăллă коммуникацисен министерствин Хисеп грамотисем В.Аччан ĕçне пысăка хурса хакланине çирĕплетеççĕ. Вăл çавăн пекех журналистсен Леонид Ильин ячĕллĕ преми лауреачĕ, Пĕтĕм Раççейри "Раççейĕн чи лайăх сăн ÿкерчĕкĕсем" уçă проектăн "Çынсем" номинаци çĕнтерÿçи, РФ Перекет банкĕ, Чăваш Ен Шалти ĕçсен министерстви ирттерекен конкурссен лауреачĕ. Вăл сĕннипе Шупашкар хулинчи пĕр урама Президент бульварĕ ят панă.
Паян, шăп та хаçат тухнă кун, пирĕн ĕçтешĕмĕр тата юлташăмăр 60 çул тултарать. Эпир ăна çак ятпа чун-чĕререн саламласа малашне паянхи пек пултаруллă, çамрăк пулма çирĕп сывлăх, телей, пур ĕçре те ăнăçу сунатпăр.
Ĕçтешĕсем.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики