09:33 13 сентября 2013 г.
Ытлари кун "Единая Россия" политика пар-тийĕн районти уйрăмĕн 17-мĕш конференцийĕ иртрĕ. Унăн ĕçне 99 делегат, район депутачĕсен Пухăвĕн депутачĕсем, предприятисемпе организацисен, учрежденисен ертÿçисем хутшăнчĕç. Конференцире çавăн пекех район пуçлăхĕ – район депутачĕсен Пухăвĕн председателĕ И.Иванов, Чăваш Республикин Патшалăх Канашĕн депутачĕсем, контрольпе ревизи комиссийĕн регионти уйрăмĕн председателĕ В.Филимонов, регионти исполком сотрудникĕ Т.Капитонова пулчĕç.
Конференцие ертсе пыма делегатсем район администрацийĕн ертÿçине, партин вырăнти уйрăмĕн секретарьне В.Софронова суйларĕç.
Отчетлă докладра "Единая Россия" парти сĕннипе йышăннă хăш-пĕр енсене палăртса хăварнă: ял хуçалăхне пулăшма регионсене 42 млн тенкĕ хушма пулăшупа тивĕçтернĕ. Пирĕн район АПК системине аталантарма 26 млн та 899 тенкĕ патшалăх пулăшăвĕ илнĕ.
Вĕрентÿ системине çĕнетмелли программăпа килĕшÿллĕн пирĕн района кăçал 16,9 млн тенкĕ уйăрнă, çав шутра шкулсене компьютер оборудованийĕпе тивĕçтерме – 1,431 млн тенкĕ, шкул библиотекисен фондне çĕнетме – 4,4 млн тенкĕ, 7 шкул столовăйне çĕнетме – 4,65 млн тенкĕ, шкул автобусĕсем валли – 2,671 млн тенкĕ, 8 шкулта капиталлă юсав ĕçĕсем ирттерме – 5,6 млн тенкĕ.
Владислав Васильевич малашлăх ĕçĕсем çинче те чарăнса тăчĕ: çулталăк вĕçĕнче Карăклăра Кĕрешÿ центрĕ хута каймалла, Вырăскас Пикшихри, Вăтапуçĕнчи, Аслă Мамири тата Карăклăри ача сачĕсенче 4 хушма ушкăн уçăлмалла. Çак кунсенче Анаткасра фельдшерпа акушер пунктне, Шаккăл шкулне уçмалла.
Делегатсем вăрттăн сасăлав ирттерсе политканаш йышне "Хучель" ООО ертÿçине В.Александрова тата Ухман ял тăрăхĕн пуçлăхне А.Петрова илчĕç. Регионти конференцие делегат пулса кайма А. Петровпа районти культура çурчĕн директорне О.Микушинăна суйларĕç.
Атнаш ял библиотекарĕ Е.Иванова, Вăтапуç ял тăрăхĕн эксперт специалисчĕ И.Петрова тата районти БТИ директорĕ В.Иванов "Единая Россия" политика пар-тийĕн Тав çырăвне илчĕç.
Конференцие хутшăннă делегатсемпе хăнасене "Ентешсем" ансамбль савăк юрă-кĕвĕпе саламларĕ.
Хамăр корр.
Автономное учреждение «Редакция Канашской районной газеты «Канаш» Министерства информационной политики и массовых коммуникаций Чувашской Республики